للأسف ... أنا مارحمتهاش

أنا أم عمرى 35 سنة، وفى يوم من الأيام فكرت أختن بنتى الكبيرة ويا ريتنى ما فكرت، بعد ما جات الداية فضلت البنت تصرخ وتقول حرام عليكى ياأمى، بس للأسف ... أنا مارحمتهاش، بعد ماإطاهرت حصل لها نزيف وكانت حالتها صعبة خالص، تعبت البنت من كتر النزيف وكان وشها بيصفر وبدأ جسمها يتصفى من كتر الدم اللى نزل من جسمها، وانا كنت خلاص هاموت من خوفى عليها، وعلى فكرة النزيف اللى حصل خللا حالتها الصحية ضعيفة قوى، ولما كبرت أختها اللى بعدها إفتكرت اللى حصل لأختها الكبيرة وخفت عليها وقلت لايمكن أعمل فيها زى ماعملت فى أختها الكبيرة، وسيبتها من غير ختان وهى عندها دلوقتى 18 سنة ومخطوبة وزى الفل.