اتأثرت جداً بسبب حكاية صاحبتى

عمرى 28 سنة، وأنا فى يوم من الأيام اتأثرت جداً بسبب حكاية صاحبتى المقربة لىَّ، وهى كانت مشكلة بينها وبين جوزها وكانت بسبب الختان الملعون.
القصه من البداية إن صاحبتى كانت بتحب واحد زميلها حب مالوش حدود، حب زى الروايات اللى بنسمع عنها فى التليفزيون، وبعد قصة الحب الكبيرة دى تم الجواز، وأسكتى على اللى جرى لها بعد الجواز، هو يادوب شهرين وبعدها بدأ  الخناق والنكد يملا البيت، جوزها ابتدى يشتكى من عدم حبها ليه وعدم اشتياقها له زى هو ما بيشتاق لها، وتعبت فى حياتها الزوجيه فترة كبيرة وقالت أنا هاأروح لدكتورة يمكن عندى مرض له علاج ولما راحت للدكتورة وبعد الكشف والكلام مع الدكتورة قالت لها يابنتى إنتى ماعندكيش أى مرض ولكن السبب الحقيقى هو الختان، وبعدها ابتدت الدكتورة تفهم جوزها إن هى مالهاش أى ذنب فى الحالة دى، وابتدوا يتعاملوا مع المشكلة حسب توصيات الدكتورة. إنها مأساة كانت البنت فى غنى عنها لو كانت أمها فكرت فى اللى هيحصل لها فى المستقبل، وعشان كدة أنا بارفض الختان نهائى، وأنا لىَّ إخواتى اتنين بنات مش متختنين، واحدة عمرها 19 سنة والتانية عمرها 15 سنة.