أنا عمرى 22 سنة، متجوزة وعندى بنت، وأنا بارفض الختان لأنى عرفت أضراره زى الصدمة النفسية والنزيف والبرود الجنسى غير الآلام الجسدية ساعة الطهارة نفسها، يعنى أنا مش قادرة أنسى يوم الطهارة بتاعى لحد دلوقتى، أنا كنت بالعب فى أمان الله مع أصحابى ومرة واحدة خطفتنى أمى من إيدىَّ وقالت لى تعالى هانشترى حاجة حلوة وجابت لى دولسى، ودخلتنى عند الدكتورة، وفجأه أمى مسكتنى من إيدىَّ بالجامد وواحده تانى فتحت رجلىَّ على الآخر وأنا فى الوقت ده كنت هااموت من الخوف وحاسة إن قلبى هيقف، ورشت الدكتورة حاجة كانت باردة جداً، وحسيت بجرح فظيع وبعدها أغمى علىَّ وماحسيتش بحاجة إلا وانا فى البيت، لكن لما فقت حسيت بألم شديد فى المنطقة دى ومعرفتش أضم رجلىَّ ولا أقوم ألعب مع أصحابى زى الأول، ويا خرابى لما جيت أعمل حمام فضلت أصوت واصوت، وكنت حاسة إن روحى هتطلع لو عملت حمام، ومن ساعتها وأنا كرهت أى حد يكلمنى فى الموضوع ده، وأنا عندى بنت، ولا يمكن أعمل فى بنتى اللى إتعمل فىَّ، بنتى نعمة من عند ربنا لازم أحافظ عليها.

yomgedid

بوابة "يوم جديد"

  • Currently 292/5 Stars.
  • 1 2 3 4 5
97 تصويتات / 1783 مشاهدة
نشرت فى 28 يناير 2009 بواسطة yomgedid

ساحة النقاش

ابحث

تسجيل الدخول

معبد الأقصر