بلاش تعملوا فيهم اللى اتعمل فينا

أنا عمرى 33 سنة، معايا معهد خدمة إجتماعية، وأنا أم لولد وبنت، ومش ممكن هاختن بنتى أبداً بسبب اللى اتعرضت له، لأنى بعد ما ولدت الولادة الثانية حصللى ناسور مهبلى شرجى، والدكتور قاللى إن سببه الختان، وأنا دلوقتى باعانى من إفرازات جامدة وكتير قوى ومن آلام وقت الجماع وبيكون عندى إمساك كتير، وكشفت عند دكتور مسالك بولية وعمللى عملية ولكن من غير فايدة، نفس المشكلة مازالت موجودة، ونفسيتى تعبانة خالص لأن جوزى كمان بيكون مسافر لمدة شهر أو أكتر ولما بيجى بيكون من حقه يمارس معايا العلاقة الزوجية، لكن أنا بكون تعبانة خالص وهو لأنه بيحبنى قوى مش بيبين لى أنه متضايق، وحالياً تعبت من أسبوع ورحت لدكتور فى القاهرة، لكن للأسف الدكتور كان بيتكلم معايا بسخرية، وضايقنى أكتر وكمان ماكتبليش علاج، وأنا زهقت من كل حاجة من العلاج والأدوية والدنيا كلها، علشان كدة أنا مش هاختن بنتى، وبأقول لكم إرحموا بناتكم وبلاش تعملوا فيهم اللى اتعمل فينا.