حرام عليكم.... إرحمونى

أنا عمرى 47 سنة، مااتعلمتش، متجوزة وعندى أربع بنات وولد، وأنا بارفض الختان علشان عارفة أضراره وصعوباته، الختان ده حاجة وحشة وغلط واحنا لازم نغير العاده الوحشة دى، والواحدة لما بتفتكر اليوم ده بتقول ده كان يوم إسود ومهبب، وانا شفت الويل.

لما سمعت إنهم جابوا الداية وقالوا هانطاهرك  قلبى وقع فى رجلىَّ وفضلت أجرى منهم فوق السطح وسطح الجيران وهما  بيجروا ورايا لحد ما مسكونى، تلت أشخاص وأنا عمالة أصرخ كل صرخة وصرخة وأقول حرام عليكم حرام، بصيت لقيت كوم  هدوم قديمة بيفرشوها على الأرض، وطبق فيه رماد فرن، ومسكونى ونيمونى على الهدوم وفتحوا رجلىَّ بالعافية، وأنا عمالة أصرخ والداية قاعدة قدامى، وبصيت لقيتها مسكت الحتة اللى هتتقطع بالرماد وعمالة تدعك فيها بالقوى قال علشان تمرض والدم يهرب منها، وانا عمالة أصرخ وأقول حرام عليكم ... إرحمونى، وجابت موس من الشنطة اللى معاها وقطعت، ولقيت الهدوم غرقانة دم زى ما يكون واحدة ولدت، وجابت رماد تانى تسد الجرح وتكويه، بعد كدة ربطوا الجرح وقبل ما يربطوا الجرح جابت قطنة وغطستها فى الزيت وحطيتها مكان الحتت اللي قطعوها، وبعد كدة ربطت الجرح، وكان ألم فظيع فظيع بحس بيه، وماكنتش عارفة أروح الحمام إلا لازم حد يسندنى، وكنت لما اتبول أصرخ كل صرخة وصرخة علو كدة، وبعد تلت أيام جابوا طشت وسخنوا ميه وقعدونى فيها، وحاولوا يخلعوا الرباط مكانوش عارفين، قالولى حوشيه إنتى وكل ما يقولوا لى حوشى الرباط أصرخ وأقول مش قادرة، راحت ستى شدت الرباط بالعافية ونزل دم كتير، وفضل الدم ينزل وفرشوا لى على السرير مشمع وحطوا عليه هدوم، وكل شوية يحوشوا الهدوم اللى تحتيه غرقانة دم، قعدت على كدة شهر لحد ما صحيت من الجرح.