أنا عمرى 24 سنة ومعايا دبلوم، متجوزة وعندى بنت، وأنا باكره الختان لأن له أضرار كتيرة على العلاقة الزوجية، زى البرود الجنسى اللى أنا باعانى منه ولكن الحمد لله جوزى متفهم إن السبب من الختان وعلشان كدة مقتنع إننا مش هانختن بنتنا.
ويوم الختان كان يوم صعب قوى علىَّ، وأنا إتفاجئت لأن ستى قالت لى تعالى نروح عند الدكتور علشان أكشف وأتسند عليكى، ومسكونى واتختنت وكمان من غير بنج ومحصلش نزيف ولا أى حاجة، ولكن قعدت أكتر من أسبوع وانا تعبانة بالذات لما أتبول.
وفيه موقف كمان تانى شفته مع واحدة صاحبتى، إتختنت وهى فى تانية إعدادى وحصل لها نزيف ومن كتر النزيف ماتت، وانا مش قادرة أنسى الموقف ده أبداً، لأن ماكنش فيه إهتمام حتى إنهم يودوها للدكتور.
وواحدة صاحبتى تانية كانت داخلة أولى ثانوى إتختنت وبسبب الختان عندها عقده من الجواز ولحد دلوقتى مش عايزة تتجوز وكل مايجيلها عريس ترفضه.
ساحة النقاش