آثار خطيرة جداً فى نفسية أى بنت

انتو فاكرين إن الختان للبنات حاجة صح وبالذات لو تمت العملية دى عند الدكتور. قصتى بدأت إنى إتختنت وبدأت أقابل مشاكل كتيرة جداً فى حياتى فى سن البلوغ وضعف فى شخصيتى وضعف فى جسدى، ولسه بأقابل المشاكل دى وأكتر من كدة، لسه العملية دى بتسبب لى مشاكل وأنا نفسى أقول لكل الناس مايعملوش لبناتهم ختان،  لأنه بيسبب مشاكل كتيرة للبنات وبيسيب آثار خطيرة جداً فى نفسية أى فتاة، بل ممكن يسبب لها عقدة نفسية. أنا بحس ببعض الفروق بينى وبين زميلاتى وصديقاتى أكاد اكون أضعفهم، وبحس بكدة لما الناس يقولوا لى إنتى منطوية، لكن الحمد لله فى بعض الأوقات بكون إنسانة بحبوحة، وفى النهاية بانصح كل الأمهات أنهم يتعلموا من تجربتى ويعرفوا أن العادات دى غير صحيحة بالمرة.