أنا لو خلفت بنت ... عمرى ما هاعمل فيها كدة

أقول لكم إيه كان عندى عشر سنوات، وقتها أمى صحتنى بدري وقالت لى قومى واستحمي وانا أحضر لك الفطار، وعملت لى بيض و لبن و قالت لي يللا هنروح عند عمتك، ولبست ورحنا عند عمتى وأول ما دخلت عندها لقيت ست سمرا قاعدة فقلت لها مين دي، قالتلي دي اللي هتخليكى تكبرى وتتجوزى، قلتلها لأ أنا مش هاتجوز قالتلى لأ لازم وأنا هجيبلك لحمة وفراخ طول الأسبوع، قلتلها ماشى وفرحت أوى باللحمة والفراخ وياريتنى ما قلتلها أيوه راحت أمى وعمتى مسكونى وراحت الست السودا حطة الطرحة السودا علي وشي وراحت مطهرانى وحصلى نزيف وخدونى وطلعوا علي الدكتور، والدكتور زعق لهم وشتمهم وقعدت يوم بحاله فى المستشفى، وبعدين لما كبرت واتجوزت حصلت مشاكل كبيرة بينى وبين جوزى بسبب تأخير الخلفة وكنت هطلق بس جريت على الدكتورة واتعالجت كتير وعرفت ان تأخير الخلفة كان بسبب الطهاره، فقلت إيه لو أنا خلفت بنت عمرى... ما هاعمل فيها كدة وعمرى ما هعرضها للي حصلى وباقول للناس اللي بيطهروا بنتهم إن الأساس فى تربية البنت مش قطع حتة من جسمها، وهى دى حكايتى.